Fyrsta göngugleði Ferðafélags Árnesinga verður laugardag 18. apríl. Safnast verður saman við Samkaup (Hornið) við Tryggvagötu 40 á Selfossi, þar sem fólk getur sameinast í bíla. Fara þarf á fjórhjóladrifnum bílum, en alls ekki er krafa um öfluga jeppa. Lagt verður af stað kl 09:30 og ekið sem leið liggur upp á Hellisheiði og þaðan um slóða til norðurs að Ölkelduhálsi. Þaðan verður gengið á Hrómundartind. Áætluð heimkoma er kl 14:30.

Read more: Göngugleði á Hrómundartind lau 18. apríl

Fyrsti félagsfundur Ferðafélags Árnesinga, eftir stofnfundinn, verður fimmtudag 16. apríl kl 20 í sal Karlakórs Selfoss syðst við Eyraveg. Páll Ásgeir Ásgeirsson mun koma með fræðslu á þann fund og kynna ferðabækur sínar. Umræður um sumarstarfið.

Read more: Félagsfundur fimmtudagskvöld 16. apríl

Ný deild í Ferðafélagi Íslands, Ferðafélag Árnesinga, var stofnuð á Selfossi þann 12. mars s.l. Fyrstu stjórn þess skipa Jón G. Bergsson formaður og meðstjórnendurnir Daði Garðarsson, Eiríkur Ingvarsson, Soffía Sigurðardóttir og Ægir Sævarsson. Varamenn eru Ragnheiður Ástvaldsdóttir og Sigrún Óskarsdóttir. Skjalavörður var kosinn Þorsteinn Másson. Þegar hafa um 70 manns skráð sig í félagið og gefst fólki enn kostur á að gerast stofnfélagar.

Félagið mun beita sér fyrir ferðalögum innanlands, einkum um sunnanvert landið. Hefur það í hyggju að taka skála í fóstur, eða jafnvel að byggja nýja, kynna gönguleiðir og efla möguleika og virkni fólks á öllum aldri í gönguferðum og annarri útiveru. Von er á ferða- og verkefnaáætlun félagsins þegar nær dregur vori.

Áhugasömu fólki er bent á að hafa samband við formanninn með tölvupósti á This email address is being protected from spambots. You need JavaScript enabled to view it. .

 

Meðfylgjandi er 1 mynd af stjórnarmönnum. Talið frá vinstri, Ægir, Eiríkur, Daði, Soffía, Jón.